هەڵسەنگاندن
- شێوازی هەڵسەنگاندن
- لە ناردنەوە تا بڵاوکردنەوە
- بڕیارەکان
- نهێنی و ناکۆکیی بەرژەوەندی
- پرسیار و تانەدان
- ڕێنمایی بۆ هەڵسەنگێنەران
- ببە بە هەڵسەنگێنەر
شێوازی هەڵسەنگاندن
هەموو توێژینەوەیەکی ڕەسەن و توێژینەوەیەکی پێداچوونەوە لە گۆڤارەکەدا هەڵسەنگاندنی دوولایەنەی شاراوە تێدەپەڕێنێت: هەڵسەنگێنەران توێژەران ناناسن، و توێژەرانیش هەڵسەنگێنەران ناناسن. هەر توێژینەوەیەک لانیکەم دوو هەڵسەنگێنەری دەرەکی کە پسپۆڕی بابەتەکەن دەیخوێننەوە. سەرنووسەر لەسەر بنەمای ڕاپۆرتەکانیان بڕیاری کۆتایی دەدات.
لە ناردنەوە تا بڵاوکردنەوە
- ناردن. توێژەر لە ڕێگەی ئەم وێبسایتەوە توێژینەوەکەی دەنێرێت، بە پێی ڕێنمایی توێژەران: فایلێکی بێ ناو بۆ هەڵسەنگێنەران و فایلێکی تر لەگەڵ پەڕەی ناونیشان.
- پشکنینی دەستەی نووسەران. نووسەران دڵنیا دەبنەوە کە توێژینەوەکە لە بواری گۆڤاردایە، کڵێشەکەی ڕەچاوکردووە و تەواوە. هەموو توێژینەوەیەک بۆ ڕێژەی لێکچوون لەگەڵ سەرچاوەکانی تر دەپشکنرێت (بڕوانە ئاکاری بڵاوکردنەوە). ئەو توێژینەوانەی تێناپەڕن لەم قۆناغەدا ڕەتدەکرێنەوە یان دەگەڕێنرێنەوە بۆ توێژەر.
- کرێی بڵاوکردنەوە. ئەگەر توێژینەوەکە پشکنینەکەی تێپەڕاند، نووسینگەی گۆڤار داوا لە توێژەر دەکات پێش دەستپێکردنی هەڵسەنگاندن کرێی بڵاوکردنەوە بدات.
- هەڵسەنگاندن. سەرنووسەری بەش لانیکەم دوو هەڵسەنگێنەری دەرەکی بانگهێشت دەکات. هەڵسەنگێنەران لە ماوەی هەفتەیەکدا بانگهێشتەکە وەردەگرن یان ڕەتیدەکەنەوە، و لە ماوەی 30 ڕۆژدا ڕاپۆرتەکەیان دەنێرن. ئەگەر ڕایان جیاواز بوو، سەرنووسەر داوای هەڵسەنگێنەری سێیەم دەکات.
- بڕیار. سەرنووسەر بڕیارەکە و تێبینییەکانی هەڵسەنگێنەران بۆ توێژەر دەنێرێت (بڕوانە خوارەوە).
- چاککردن. توێژەر لە ماوەی 30 ڕۆژدا توێژینەوەکە چاک دەکات، هەموو گۆڕانکارییەک دیاری دەکات، و لە وەڵامێکی کورتدا ڕووندەکاتەوە چۆن مامەڵەی لەگەڵ هەر تێبینییەک کردووە. سەرنووسەر دەتوانێت بە داوای توێژەر ماوەکە بۆ 60 ڕۆژ درێژ بکاتەوە. لەوانەیە سەرنووسەر توێژینەوە چاککراوەکە بگەڕێنێتەوە بۆ هەڵسەنگێنەران.
- فایلە کۆتاییەکان. دوای قەبووڵکردن، توێژەر وەشانی کۆتایی بە کڵێشەی کۆتایی گۆڤار (کڵێشەی قۆناغی دووەم) ئامادە دەکات و ئەو زانیارییانەی توێژەران دەنێرێت کە نووسینگەی گۆڤار داوایان دەکات.
- بڵاوکردنەوە. توێژینەوەکە ڕاستکردنەوەی زمانی و ڕیزکردنی بۆ دەکرێت و توێژەر پێیدا دەچێتەوە، پاشان هەر کە ئامادە بوو لەگەڵ DOI بە ئۆنلاین بڵاودەکرێتەوە، پێش داخستنی ژمارەکە.
هەندێک جار هەڵسەنگاندن لە 30 ڕۆژ زیاتر دەخایەنێت، بۆ نموونە کاتێک گونجاوترین هەڵسەنگێنەران لە دەرەوەی هەرێمی کوردستان و عێراق کار دەکەن. لەو کاتەدا نووسینگەی گۆڤار توێژەر ئاگادار دەکاتەوە.
بڕیارەکان
- قەبووڵکردن: توێژینەوەکە وەک خۆی قەبووڵ دەکرێت.
- چاککردنی بچووک: گۆڕانکاریی بچووک، سەرنووسەر دەیپشکنێت.
- چاککردنی گەورە: گۆڕانکاریی بنەڕەتی؛ توێژینەوە چاککراوەکە زۆربەی جار دەگەڕێتەوە بۆ هەڵسەنگێنەران.
- ڕەتکردنەوە: توێژینەوەکە بۆ گۆڤارەکە گونجاو نییە.
نهێنی و ناکۆکیی بەرژەوەندی
- ئەو توێژینەوانەی لە هەڵسەنگاندندان نهێنین. نووسەران و هەڵسەنگێنەران بۆیان نییە بڵاویان بکەنەوە یان بیرۆکە و داتا بڵاونەکراوەکانیان بەکاربهێنن.
- ناسنامەی هەڵسەنگێنەران هەرگیز بۆ توێژەران ئاشکرا ناکرێت.
- نووسەران و هەڵسەنگێنەران دەبێت هەر ناکۆکییەکی بەرژەوەندی لەگەڵ توێژەران ڕابگەیەنن (بۆ نموونە هاوکارێکی نزیک، هاوتوێژەر، خوێندکار یان ڕکابەر) و خۆیان لەو توێژینەوەیە دوور بخەنەوە.
- توێژەران دەتوانن داوا بکەن کەسێکی دیاریکراو توێژینەوەکەیان هەڵنەسەنگێنێت؛ نووسەران ڕێز لە داوا گونجاوەکان دەگرن.
- کاتێک یەکێک لە نووسەرانی گۆڤار توێژینەوەیەک دەنێرێت، نووسەرێکی تر سەرپەرشتی دەکات، و خاوەنی توێژینەوەکە بەشداری لە هیچ بڕیارێکی تایبەت بەوەدا ناکات.
- نابێت توێژینەوەکە لە هەمان کاتدا لە گۆڤارێکی تردا لە هەڵسەنگاندندا بێت.
پرسیار و تانەدان
ئەگەر پێتوایە بڕیارێک لەسەر هەڵەیەکی ڕوون دراوە، دەتوانیت لە ماوەی 30 ڕۆژدا بە نامە بۆ سەرنووسەر لە jhss.office@koyauniversity.org تانە بدەیت. هەڵەکە ڕوون بکەرەوە و بەڵگەکانت بنێرە. سەرنووسەر لەگەڵ نووسەرێکی تر کە بەشداری بڕیارەکەی نەکردووە تانەکە تاوتوێ دەکەن؛ بڕیاریان کۆتاییە.
ڕێنمایی بۆ هەڵسەنگێنەران
سوپاس بۆ هەڵسەنگاندنت بۆ گۆڤارەکەمان. هەڵسەنگاندنی باش دادپەروەر و ورد و بنیاتنەرە: یارمەتیی سەرنووسەر دەدات بڕیار بدات، و یارمەتیی توێژەر دەدات توێژینەوەکەی باشتر بکات.
پێش وەرگرتنی بانگهێشت
- تەنها ئەوکاتە وەریبگرە کە توێژینەوەکە لە بواری خۆتدا بێت و بتوانیت لە ماوەی 30 ڕۆژدا ڕاپۆرتەکەت بنێریت. لە ماوەی هەفتەیەکدا وەڵامی بانگهێشتەکە بدەرەوە.
- ڕەتی بکەرەوە ئەگەر ناکۆکیی بەرژەوەندیت هەیە، یان پێتوایە توێژەران دەناسیت.
چی هەڵدەسەنگێنیت
- ڕەسەنایەتی و گرنگی: ئایا توێژینەوەکە شتێکی نوێ بۆ بوارەکەی زیاد دەکات؟
- گونجان لەگەڵ گۆڤار: ئایا لەناو ئامانج و بواری گۆڤاردایە؟
- میتۆد: ئایا ڕێگاکە بۆ پرسیارەکە گونجاوە، و بە ڕوونییەک باسکراوە کە بکرێت بەدوایدا بچیت یان دووبارەی بکەیتەوە؟
- بەڵگە و ئارگیومێنت: ئایا دەرئەنجامەکان لە سەرچاوە یان داتا یان شیکارییەکەوە دێن؟
- توێژینەوە پێشووەکان و سەرچاوەکان: ئایا توێژینەوەکە ئاوڕ لە کارە پەیوەندیدار و نوێیەکان دەداتەوە، و بە دروستی بە شێوازی APA ئاماژەیان پێدەدات؟
- پوختە و ناونیشان: ئایا بە وردی توێژینەوەکە دەناسێنن، وەشانە ئینگلیزییەکانیشیان؟
- زمان و پێکهاتە: ئایا ڕوون و ڕێکخراوە؟ ئاماژە بە کێشەکان بکە، پێویست ناکات خۆت زمانەکەی ڕاست بکەیتەوە.
- ئاکار: ئەگەر گومانت لە بەرهەم دزی یان ساختەکاری هەبوو، یان توێژینەوەیەک کە پێویستی بە ڕەزامەندیی ئاکاری بووە و باسی نەکردووە، سەرنووسەر ئاگادار بکەرەوە.
ڕاپۆرتەکەت
- فۆڕمی هەڵسەنگاندنی گۆڤار لە سیستەمەکەدا پڕبکەرەوە و بڕیارێک پێشنیاز بکە: قەبووڵکردن، چاککردنی بچووک، چاککردنی گەورە یان ڕەتکردنەوە.
- بۆ توێژەر تێبینی بنووسە کە پێشنیازەکەت ڕوون بکاتەوە و بڵێت چی دەبێت بگۆڕدرێت، بە وردی و بە ڕێزەوە. تێبینییەکان کە تەنها بۆ سەرنووسەرن لە خانەی نهێنیدا بنووسە.
- ڕاستەوخۆ پەیوەندی بە توێژەرانەوە مەکە، توێژینەوەکە لەگەڵ کەس بەش مەکە، و مەیخەرە سەر ئامرازەکانی زیرەکیی دەستکرد یان هیچ خزمەتگوزارییەکی تری ئۆنلاین.
ببە بە هەڵسەنگێنەر
ئەگەر بڕوانامەی دکتۆرات لە یەکێک لەو بوارانەدا هەیە کە بڵاوی دەکەینەوە و دەتەوێت هەڵسەنگێنەر بیت، لەم وێبسایتەدا خۆت تۆمار بکە و هەڵسەنگێنەر هەڵبژێرە لەگەڵ بوارەکانی پسپۆڕیت. هەروەها دەتوانیت نامە بنێریت بۆ jhss.office@koyauniversity.org.



